ئیداره‌ی لامه‌ركه‌زی و ده‌ستپێشخه‌ری ئاوه‌دانكردنه‌وه‌
دكتۆر به‌رهه‌م ئه‌حمه‌د ساڵح جێگری‌ سه‌رۆك وه‌زیرانی‌ عیراق، سه‌رپه‌رشتی‌ و چاودێری‌ چه‌ندین كۆبوونه‌وه‌ و كۆنگره‌ی‌ تایبه‌تی‌ كردووه‌ بۆ ئاوه‌دانكردنه‌وه‌ و بووژاندنه‌وه‌ی‌ كه‌رت و بوار و ناوچه‌ و پارێزگاكانی‌ عیراق و هه‌میشه‌ هه‌وڵیداوه‌ بۆ ئه‌وه‌ی‌ پارێزگا و ناوچه‌كانی‌ عیراق بودجه‌ و توانای‌ پێویستیان بخرێته‌ به‌رده‌ست بۆ بووژاندنه‌وه‌ و ئاوه‌دانكردنه‌وه‌ و خزمه‌تكردنی‌ هاووڵاتیانی‌ ناوچه‌ جیاجیاكان.

له‌ ماوه‌ی‌ هه‌ڵسوڕانی‌ حكومه‌تی‌ هه‌ڵبژێردراوی گه‌لانی‌ عیراقدا، دكتۆر به‌رهه‌م ساڵح سه‌رپه‌رشتیی راسته‌وخۆی‌ كۆبوونه‌وه‌ و كۆنگره‌كانی‌ تایبه‌ت به‌ ئاوه‌دانكردنه‌وه‌ و بوژاندنه‌وه‌ی‌ پارێزگاكانی‌ عیراقی كردووه‌ و هه‌وڵیداوه‌ وه‌ك پیاوی ده‌وڵه‌ت و رۆڵه‌ی‌ وڵات خزمه‌تی‌ گشت پارێزگا و ناوچه‌كانی‌ عیراق بكات، نه‌ك ته‌نها به‌ حوكمی‌ نوێنه‌رایه‌تی‌ كردنی‌ هه‌رێمی‌ كوردستان ته‌نها گرنگی به‌ ناوچه‌ی‌ كوردستان بدات به‌ڵكو د. به‌رهه‌م هه‌میشه‌ له‌ هه‌وڵدا بووه‌ بۆ ئه‌وه‌ی‌ خزمه‌تی‌ گشت ناوچه‌كان بكات و پرۆژه‌ی‌ ئاوه‌دانكردنه‌وه‌ و بوژاندنه‌وه‌ی‌ لێ ئه‌نجام بدات.

دكتۆر به‌رهه‌م له‌ ماوه‌ی‌ كاركردنیدا سه‌رپه‌رشتی‌ كۆنگره‌یه‌كی‌ تایبه‌ت به‌ ئاوه‌دانكردنه‌وه‌ی‌ به‌غدای‌ پایته‌ختی‌ كرد و نه‌خشه‌ی‌ رێگای‌ داڕشت بۆ ئاوه‌دانكردنه‌وه‌ و بوژاندنه‌وه‌ی‌ به‌غدا و به‌رزكردنه‌وه‌ی‌ ئاستی‌ خزمه‌تگوزاری‌ و ته‌رخان كردنی‌ بودجه‌ی‌ وه‌به‌رهێنان بۆ پرۆژه‌ جیاوازه‌كان و چۆنیه‌تی‌ به‌گه‌ڕ خستنی‌ گشت هه‌وڵ و ته‌قه‌لاكان له‌ پێناوی‌ ئاوه‌دانكردنه‌وه‌ی‌ به‌غدا كه‌ له‌ ئاست هیوا و ئومێدی‌ به‌غدادا بێت وه‌ك پایته‌ختی‌ فیدراڵی‌ عیراق.

هه‌روه‌ك دكتۆر به‌رهه‌م ئه‌حمه‌د ساڵح سه‌رپه‌رشتی‌ چه‌ندین كۆبوونه‌وه‌ و كۆنگره‌ی‌ كردووه‌ بۆ پارێزگای‌ كه‌ركوك و ناوچه‌كانی‌ جێگه‌ی‌ ناكۆكی‌ و چه‌ندین جاریش سه‌ردانی‌ ئه‌و ناوچانه‌ی‌ كردووه‌ و هه‌وڵیداوه‌ له‌ نزیكه‌وه‌ ئاگاداری‌ واقیعی ژیان ئاوه‌دانكردنه‌وه‌ و به‌ڕێوه‌چوونی‌ پرۆژه‌كانی‌ ئاوه‌دانكردنه‌وه‌ بێت، هه‌روه‌ك هه‌وڵیداوه‌ بۆ ئه‌وه‌ی‌ پێداویستییه‌كانیان بۆ دابین بكات و جوڵه‌یه‌ك بخاته‌ نێو پرۆژه‌كان و به‌رپرسانی‌ پارێزگای‌ كه‌ركوك و ناوچه‌كانی‌ تر هان بدات بۆ ئه‌وه‌ی‌ به‌ شێوه‌یه‌كی‌ باشتر و گورجوگۆڵ‌ تر پرۆژه‌كان به‌ڕێوه‌به‌رن و خزمه‌تگوزاری‌ پێشكه‌شی‌ هاووڵاتیان بكه‌ن.

هه‌روا دكتۆر به‌رهه‌م ئه‌حمه‌د ساڵح جێگری‌ سه‌رۆك وه‌زیرانی‌ عیراق، سه‌رپه‌رشتی‌ راسته‌وخۆی‌ كۆنگره‌ی‌ تایبه‌ت به‌ بوژاندنه‌وه‌ی‌ به‌نده‌ری‌ ئوم قه‌سر و به‌نده‌ر و ده‌روازه‌ ئاوییه‌كانی‌ عیراقی‌ له‌ شاری‌ به‌سره‌ كردووه‌ و نه‌خشه‌ی‌ رێگای‌ بۆ ئه‌و بواره‌ داڕشتووه‌ و پلانسازی كردووه‌ بۆ ده‌ست به‌كاربوون به‌ دروست كردنی‌ به‌نده‌ری‌ گه‌وره‌ی‌ عیراق كه‌ پرۆژه‌یه‌كی‌ گرنگی‌ قۆناغی داهاتووی‌ عیراق داده‌نرێت و خزمه‌ت و سوودێكی‌ زۆر به‌ وڵات ده‌گه‌یه‌نێت. هه‌روه‌ك سه‌رپه‌رشتی‌ كۆنگره‌یه‌كی‌ تایبه‌تی‌ به‌ پارێزگای‌ به‌سره‌ی‌ كردووه‌ و له‌ نزیكه‌وه‌ لێكۆڵینه‌وه‌ی‌ كردووه‌ له‌ باری‌ ئه‌و پارێزگایه‌ و به‌هه‌داردانی‌ سامانی‌ نه‌وتی‌ به‌سره‌ و عیراق و ئاودیو كردنی‌ له‌ لایه‌ن باند و مافیا و میلیشیاكانه‌وه‌ كه‌ حاڵه‌تێكی‌ ناجۆر و نه‌خوازراوی له‌و ناوچه‌یه‌ دروست كردبوو و رۆژانه‌ بڕێكی‌ زۆری‌ سامانی‌ عیراق به‌ فیڕۆ ده‌ڕۆیشت به‌بێ‌ ئه‌وه‌ی‌ هاووڵاتیان سوود له‌ به‌كارهێنانی‌ و له‌ قازانجی ناردنه‌ ده‌ره‌وه‌ی‌ بكه‌ن.

د. به‌رهه‌م هه‌ر له‌ماوه‌ی‌ ده‌ست به‌كاربوونیدا له‌ پۆستی‌ جێگری‌ سه‌رۆك وه‌زیرانی‌ عیراق و سه‌رۆكی‌ لیژنه‌ی‌ ئابووری‌، كۆنگره‌ی‌ ئاوه‌دانكردنه‌وه‌ و بووژاندنه‌وه‌ و دانانی‌ نه‌خشه‌ی‌ رێگه‌ی‌ ئاوه‌دانی‌ و په‌ره‌پێدانی‌ بۆ پارێزگاكانی‌ كوت و ناسریه‌ و ئه‌نبار و تكریت و ناوچه‌كانی‌ تر و هه‌روه‌ك سه‌رپه‌رشتی‌ كۆبوونه‌وه‌یه‌كی‌ تایبه‌تی‌ كرد بۆ بره‌و پێدانی‌ هاوكاری‌ و په‌یوه‌ندی نێوان پارێزگاكانی‌ هه‌رێمی‌ كوردستان و پارێزگاكانی‌ كه‌ركوك و تكریت و موسڵ‌ و ناوچه‌كانی‌ تر.