ئەمرۆ 16/1/2009 دکتۆر بەرهەم ئەحمەد ساڵح سەرۆکى حکومەتى هەرێمى کوردستان لە شارى سلێمانى لەگەڵ یەکێتی دادوەرانى کوردستان کۆبۆوە.
لەو کۆبوونەوەیەدا، سەرۆکى حکومەتى هەرێم جەختى کردەوە لەسەر گرنگی و پێویستى چەسپاندنى یاسا و زامنکردنى سەروەریی و سەربەخۆیی یاسا و ئاماژەیکرد بە رۆڵى گرنگی دادوەر و پسپۆڕییە یاساییەکان لە گەشەپێدان و پێشخستنى کۆمەڵگا و گەلاڵەکردنى راى گشتى و دابینکردنى زەمینەى پێویست بۆ جێگیرکردن و بەرەو پێشەوەبردنى ئەزموونى حوکمڕانى لە وڵاتدا.
د.بەرهەم ئەحمەد ساڵح رایگەیاند لە حکومەتى هەرێمى کوردستان لە ماوەى چەند رۆژى داهاتوودا پرۆژەى بودجەى ساڵى نوێ ئامادە دەکات و ڕەوانەى پەرلەمانى کوردستانى دەکات، کە پرۆژەیەکى دەوڵەمەندی يەكانگيرە و گرنگییەکى زۆریداوە بە زیادکردنى بودجەى وەبەرهێنان و هەنگاوی گرنگیشى لە بەرچاو گرتووە بۆ یەکخستنەوەى بڕیار و وردەکارییەکان و هەنگاونانى فیعلى بۆ یەکخستنەوەى ئیدارە و تایبەتمەندییەکان تاکو هەرێمى کوردستان ببێتە خاوەنى یەک حکومەتى کارا و دەسەڵات و بڕیارەکانیش بەسەر یەکە ئیدارییەکاندا دابەش بکات، نەک تەنها دەسەڵاتەکان لە لای وەزارەت و دەزگا باڵاکان کۆبکاتەوە تاکو کاروبار و مامەڵە ئیدارییەکان بە شێوەیەکى باشتر و خێرا تر بەڕێوە بچێت.
سەرۆکى حکومەت لەکۆبوونەوەیدا لەگەڵ دادوەران ئاماژەیکرد بە گرنگی پەرەپێدانى خزمەتگوزارى گشتى وەک بەشێکى گرنگى ئەرکەکانى حکومەت و دوورخستنەوەى کاریگەرى و کارلێکى سیاسى لەسەر کاروبار و ئیشوکارە حکومییەکان تاکو حکومەت بە ئەرکی خۆى هەڵسآ لە خزمەتکردنى خەڵک و پەرەپێدانى خزمەتگوزارییەکان و ئەنجامدانى پرۆژەى خزمەتگوزارى و وەبەرهێنان لە ژێرخانى هەرێمى کوردستاندا.
هەر لەو کۆبوونەوەیەدا چەند ئەندامێکى یەکێتى دادوەرانى کوردستان باسیان لە کێشە و ئاستەنگ و گرفتەکانى بەردەم پرۆسەى یاسا و کێشەکانى تایبەت بە دادوەران و جێبەجێکردن و سەقامگیرکردنى سەروەرى و سەربەخۆیی یاسا کرد و سەرۆکى حکومەتیش پشتیوانى و پشتگیرى دووپات کردەوە بۆ یاسا و جێگیرکردنى یاسا و چارەسەرکردنى کێشەکان و لابردنى رێگرى و لەمپەرەکان.
هەر هەمان رۆژ سەرۆکى حکومەتى هەرێمى کوردستان بە یاوەرى د.تاهیر هەورامى وەزیرى تەندروستى و د.رێکەوت حەمە رەشید بەڕێوەبەرى گشتى تەندروستى سلێمانى سەردانى نەخۆشخانەى هیواى لە سلێمانى کرد و لە نزیکەوە ئاگادارى ئاستى خزمەتگوزارى و تەندروستى نەخۆشخانەکە بوو و لە کێشە و کەموکوڕى و گرفتەکانى نەخۆشخانەى هیواى کۆڵییەوە و بڕیارى پێویستیدا بۆ دابینکردنى پێداویستییەکان و چارەسەرکردنى گرفت و کێشەکان.
لە چوارچێوەی سەردانەكانيدا لەشاری سلێمانی هەمان رۆژ بە یاوەرى خاتوو هێرۆ ئیبراهیم ئەحمەد سەردانى مۆزەخانەى سلێمانیی کرد و دەستخۆشى لە بەڕێوەبەرایەتى مۆزەخانە کرد لە هەوڵەکانیان بۆ پاراستن و خستنەڕووى شوێنەوارە مێژوویی و کەلەپورییەکان و داوایکرد مۆزەخانەى سلێمانى لە سەر شێواز و سیستمێکى نوآ رێکبخرێتەوە و پەرە بەکار و چالاکی و خستنەڕوو و کۆکردنەوەى شوێنەوارە مێژووییەکان بدرێت.