سەر لە بەیانى ئەمڕۆ یەکەمین رۆژى جەژنى قوربانى پیرۆز 27/11، د. بەرهەم ئەحمەد ساڵح سەرۆکى حکومەتى هەرێمى کوردستان بە یاوەرى کامەران ئەحمەد وەزیرى ئاوەدانکردنەوە و د. مەجید حەمەد ئەمین وەزیرى کاروبارى شەهیدان و ئەنفالکراوان سەردانى شارى چەمچەمال و ناحیەى شۆڕشى کرد و پیرۆزبایی جەژنى لە هاووڵاتیان و کەسوکارى شەهیدان و ئەنفالکراوان کرد و لە مەراسیمێکدا بەردى بناغەى پرۆژەى دروستکردنى 900 خانووى بۆ کەسوکار و وارسى ئەنفالکراوان دانا و رایگەیاند لە ماوەى نزیکی داهاتوودا پرۆژەى دروستکردنى 1200 خانووى تر بۆ وارسى ئەنفالکراوان رادەگەیەنرێت.

هەر ئەمڕۆ د. بەرهەم ئەحمەد ساڵح لە شارى چەمچەمال و ناحیەى شۆڕش بەردى بناغەى مۆنۆمێنت و مەزارگەى ئەنفالکراوانى دانا و لە وتەیەکیدا بەو بۆنەیەوە پیرۆزبایی جەژنى قوربانى لە هاووڵاتیان و کەسوکار و وارسى شەهیدان و ئەنفالکراوان کرد و تەئکیدی کردەوە کە ئەم پرۆژانەى حکومەت بۆ خزمەتى وارسى شەهیدان و ئەنفالکراوان جێبەجێى دەکات وەبیرهێنانەوەى ئەو شەوزەنگ و داپڵۆسینانەیە کە رژێمى پێشوو لە دژى کۆمەڵانى خەڵک ئەنجامی داون و ئاماژەیکرد بەوەى ئەرکی سەرشانى ئێمەیە لەم سەردەمەدا لە خزمەتى قوربانیانى و کەسوکارى شەهیدان و ئەنفالکراواندا بین بەو هیوایەى ببڕاى ببڕ جارێکى تر نەهامەتى و چەوسانەوە روونەکاتەوە ئەم وڵاتە و هەموومان پێکەوە بە دڵسۆزى و سۆزەوە خزمەتى وڵات و دەسکەوتە بەدیهاتووەکان بکەین و لە خەمى چارەسەرى کەموکورتى و گرفتەکاندا بین.

سەرۆکى حکومەتى هەرێمى کوردستان لە وتارەکەیدا رایگەیاند هیوادارین سەردانى ئێمە و وەفدی باڵاى حکومەت بۆ چەمچەمال و شۆڕش لە بەیانیی یەکەم رۆژى جەژنى قوربانی پیرۆزدا پەیامێک بێت بۆ جەخت کردنەوە لە سەر بایەخى هەمیشەیی و بەردەوامى حکومەتەکەى خۆتان لە خزمەتکردن و بایەخدان بە ژیان و گوزەرانتان و بە دروستکردنى ئەم مۆنۆمێنتەش بایەخ بە یادگارییەکان بدەین و بەرز رایانبگرین و بایەخیان پێبدەین تاکو مێژوو کارەساتە گەورەکانى میللەتەکەمان لە یاد نەکات و بەردەوام کەرەستە و ئەرشیفى ئەو کارەساتانە لە بەردەمى نەوەکانى داهاتوودا بن.

هەروا سەرۆکى حکومەت رایگەیاند کە کابینەى شەشەمى حکومەتى هەرێمى کوردستان بەردەوام دەبێت لە بایەخدان بە چەمچەمال و شۆڕش و کەسوکار و وارسى شەهیدان و ئەنفالکراوان و ئەمڕۆ بەردى بناغەى دروست کردنى 900 خانوو دادەنێین و لە ئایندەیەکى نزیکیش بەردى بناغەى 1200 خانووى تر دادەنێین و لە ماوەى نزیکى داهاتووش حکومەتى هەرێمى کوردستان لە رێگەى وەزارەتى کاروبارى شەهیدان و ئەنفالکراوان هیمەت و هەوڵى پێویست دەدەن بۆ ئەوەى روفاتى پیرۆزى ئەنفالکراوان بهێنرێنەوە و بە خاکى پیرۆزى کوردستان بسپێردرێن.

دکتۆر بەرهەم رایگەیاند کە یەکێک لە سەربەرزییەکانى ژیانى ئەوەیە کە لە ئیدارەى سلێمانى و لەو کاتانەى باروزروفێکى باش لە کوردستاندا نەبوو توانیمان مووچە بۆ کەسوکارى سەربەرزى ئەنفالەکان تەرخان بکەین و موژدەى ئەوەى پێدان لە بودجەى ساڵى نوى حکومەتى هەرێمى کوردستاندا بە رێژەى 50% مووچەى وارس و کەسوکارى ئەنفالەکان زیاد دەکات کە تۆزقاڵێکە لە وەفادارى حکومەتى کوردستان بۆ شەهیدان و ئەنفالەکان هەروا بایەخدانى خۆى و حکومەتى هەرێمى کوردستانى بە خزمەتکردنى کەسوکار و نەوەى شەهیدان و ئەنفالکراوان دووپات کردەوە و رایگەیاند کە هاوکار دەبین بۆ ئەوەى نەوەى نوێى شەهیدان و ئەنفالەکان بتوانن خوێندن تەواو بکەن و پسپۆڕى و بڕوانامەى باش بەدەست بهێنن و دووپاتى کردەوە خۆشحاڵە بەوەى لە یەکەمین رۆژى جەژنى قوربان لە یەکەم جەژندا وەک سەرۆکى حکومەتى هەرێمى کوردستان سەردانى چەمچەمال و شۆڕشى کردووە.