سەر لەئێوارەی دوێنێ 25/11/2009 د.بەرهەم ئەحمەد ساڵح بەئامادە بوونی وەزیری پێشمەرگەو وەزیری ناوخۆوو سەرۆکی دیوانی سەرۆکایەتی ئەنجومەنی وەزیران پێشوازیکرد لەجەنەرال ئۆدێرنۆ فەرماندەی هێزەکانی ئەمریکا لەعیراق.
لەودیدارەدا فەرماندەی هێزەکانی ئەمریکا پیرۆزبایی لەد. بەرهەم کرد بەبۆنەی وەرگرتنی پۆستی سەرۆکایەتی ئەنجومەنی وەزیران، جگە لەتاوتوێکردنی هەلومەرجی سیاسیی و سەربازی عیراق.
هەر لەودیدارەدا هەردولا باسیان لەیەکخستنەوەی هێزی پێشمەرگەی کوردستان و ئاسایشی هەرێم کرد لەژێر سایەی حکومەتی هەرێمی کوردستاندا، لەوبارەیەوە فەرماندەی هێزەکانی ئەمریکا لەعیراق خۆشحاڵی خۆی دەربڕی و هیوای خواست لەئایندەیەکی نزیکدا ئەو یەکگرتنەوەیە جێبەجێ ببێت.
سەبارەت بەپرۆسەی هەڵبژاردنی عیراقیش هەردولا تەئکیدیان کردەوە کەهەڵبژاردن حەقێکی دەستوریەو پێویستە لەوادەی دیاریکراوی خۆیدا ئەنجام بدرێت، بەرەچاوکردنی سەنگ و قورسایی سەرجەم پێکهاتەکانی عیراق بەبێ جیاوازی، هەر لەو دیدارەدا لەبەرچاوگرتنی مافە دەستووریەکانی عیراق وەکو مەرجی سەرکەوتنی پرۆسەی سیاسی عیراق و دیموکراسی وەسف کران.